Рушди маҳал-мароми мо
Дар толори маҷлисгоҳи Кумита бо иштироки ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа муҳтарам Раҳмонзода Абдулло Қурбоналӣ ва мушовири калони бахши ёрдамчӣ Ҳамидиён Орзу Зубайдулло бо кормандон мулоқот дар мавзӯи тақвияти корҳо дар самти таъмини фазои ороми иттилоотӣ, пойдории сулҳу устувории ваҳдати миллӣ, тарғиби ғояҳои ватандӯстӣ, худогоҳию худшиносии миллӣ, таъмини нақшаи чорабинҳои ҷашнӣ бахшида ба 35-солагии Истиқлоли давлатӣ ва тақвияти корҳои ободонию созандагӣ баргузор гардид.
Пас аз сухани ифтитоҳии Раиси Кумита Шарифҷон Ҷумъазода, ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа муҳтарам Раҳмонзода Абдулло Қурбоналӣ доир ба масъалаҳои болозикр суханронӣ намуда, андешаҳои худро доир ба муҳимияти таҷлили 35-солагии Истиқлоли давлатӣ, бунёди иншооти ҷашнӣ баргузории сӯҳбату вохӯриҳо ва гузаронидани корҳои таблиғотӣ бо усули “деҳа ба деҳа”, “маҳалла ба маҳалла”, “мактаб ба мактаб” баён намуда, даъват бар он дошт, ки кормандони Кумита бояд барои рушди маҳал ва таъмини нақшаи ҷашнии бунёди иншоотҳо ва дигар масъалаҳои ҳалталаби дар минтақа мавҷуд буда, бояд бештар масъулиятшинос бошанд ва ҳамкориро бо мақомоти марказӣ ва маҳаллӣ хубтар ва судманд ба роҳ монанд.
Бояд тазаккур дод, ки аз ҷониби кормандони Кумита ҳар семоҳа раванди рушди иҷтимоию иқтисодии шаҳру ноҳияҳои мамлакат, ҳамчунин тибқи супориши Пешвои миллат вазъи муассисаҳои соҳаҳои маориф, тандурустӣ, фарҳанг, саноат, сохтмон, таъмини аҳолӣ бо оби нӯшокӣ, ҳолати биноҳои ҷамоатҳои шаҳраку деҳот, кумитаҳои маҳалла ва иҷрои дастуру супоришҳои Президенти мамлакатро ҳангоми сафарҳои корӣ ба шаҳру ноҳияҳои мамлакат мавриди омӯзиш ва таҳлил қарор дода, маълумотнома барои ислоҳи камбудиҳо ва андешидани чораҳои амалӣ ба вазорату идораҳо, роҳбарони гурӯҳҳои кории ҷашни 35-солагии Истқлоли давлатӣ ва мақомоти иҷроияи маҳалии ҳокимияти давлатии шаҳру ноҳияҳо ирсол менамояд.
Кумита ҷаласаи сайёри Ҳайати мушовараро оид ба омӯзиши вазъи иҷрои Барномаи рушди иҷтимоию иқтисодии шаҳру ноҳияҳоро бо иштироки намояндагони вазорату идораҳо, мақомоти иҷроияи маҳалии ҳокимияти давлатии шаҳру ноҳияҳо дар ВМКБ, вилояти Хатлон, шаҳрҳои Бохтар, Кӯлоб, Ҳисор, Мӯъминобод, Шамсиддини Шоҳин, Мирсаид Алии Ҳамадонӣ, Ашт, Ҷаллолидини Балхӣ, Файзобод, Турсунзода, рафти татбиқи Қонуни конститутсионии Ҷумҳурии Тоҷикистон «Дар бораи мақомоти маҳаллии ҳокимияти давлатӣ» ва Қонуни Ҷумҳурии Тоҷикистон “Дар бораи мақомоти худидоракунии шаҳрак ва деҳот”-ро дар шаҳру ноҳияҳои Бохтар, Истаравшан, Исфара, Хоруғ, Рашт, Рӯдакӣ, Шаҳринав, Турсунзода, Ёвон, Хуросон, Шуғнон, Лахш, Шаҳритус, Қубодиён, ва Тоҷикобод зимни сафарҳои корӣ ба шаҳру ноҳияҳои мамлакат бо баргузор намудани семинарҳо мавриди омӯзиш ва таҳлил қарор дода, аз натиҷаи корҳои иҷрошуда ба Дастгоҳи иҷроияи Президенти Ҷумҳурии Тоҷикистон маълумот пешниҳод намуд.
Бояд зикр намуд, ки дар таъмини самаранокии фаъолияти мақомоти идоракунии маҳаллӣ доир ба амалишавии Барномаи рушди иҷтимоию иқтисодии ВМКБ, вилоятҳои Суғду Хатлон ва шаҳру ноҳияҳои тобеи ҷумҳурӣ барои солҳои 2021-2025 нишондиҳандаи баланд дар азхудкунии маблағҳои ба нақша гирифташуда, дар шаҳру ноҳияҳои Дарвоз 90,1%, Восеъ 84,2%, Дӯстӣ 83,5%, Бохтар 86,7%, Муъминобод 80,6%, Турсунзода 84,4%, Хуҷанд 77,3%, Айнӣ 71,1%, Ҷайҳун 69,2%, Бобоҷон Ғафуров 65,0%, Зафаробод 60,5%, Мурғоб 53,2%, Данғара 63,7%, Хуросон 61,7%, Вахш 89,9%, Панҷакент 60,6%, Нуробод 71,3% ва Шуғнон 59,2 фоиз ба назар расида, дар сатҳи муайян барои пешрафти иқтисодӣ ва баланд бардоштани сатҳи зиндагии аҳолӣ мусоидат менамояд.
Дар як вақт нишондиҳандаи пасти азхудкунии маблағҳои ба нақша гирифташуда ва татбиқи лоиҳаҳои барнома дар шаҳрҳои Норак-40,1 фоиз, Роғун-41,8 фоиз, Ваҳдат – 42,2 фоиз, Ҳисор – 43,4 фоиз, ноҳияҳои Шуғнон-21,2 фоиз, Ёвон-33,7 фоиз, Ховалинг-39,8 фоиз, Ванҷ – 40,2 фоиз, Носири Хисрав-44,7фоиз таъмин гардидааст.
Бо мақсади беҳбудии кор Кумита ҷаласаи сайёри Ҳайати мушовараро оид ба вазъи иҷрои “Барномаи рушди иҷтимоию иқтисодии шаҳри Роғун барои солҳои 2021-2025”-ро ба нақша гирифтааст ва гурӯҳи кории Кумита барои омӯзиш ба шаҳри Роғун сафарбар мегардад.
Самти дигар фаъолияти Кумита ин татбиқи Консепсияи идоракунии рушди маҳал дар Ҷумҳурии Тоҷикистон барои давраи то соли 2030, ки бо фармони Президенти Ҷумҳурии Тоҷикистон аз 11 июли соли 2015, №522 тасдиқ гардидааст, маҳсуб ёфта, дар он самтҳои асосӣ ва вазифаҳои стратегии ташаккули низоми идоракунии маҳал ва амалигардонии самараноки он дар ҷомеаи инкишофёбанда инъикос гардидааст. Бо мақсади пешравии корҳо гурӯҳи кории байниидоравӣ дар ҳайати нав тасдиқ гардида, ҷаласаи кориро санаи12 марти соли 2025 дар маҷлисгоҳи Кумита баргузор намуда, ҷараёни иҷрои Консепсияи идоракунии рушди маҳал барои давраи то соли 2030, аз ҷумла лоиҳаи Нақшаи амалисозии барои солҳои 2026-2030-ро мавриди муҳокимаю баррасӣ қарор дода, бо дарназардошти мушкилоти дар маҳал ҷойдошта ва талаботи имрӯза лоиҳаи Нақшаи амал азнав такмил ва таҳия карда шуд ва иҷрои корҳо дар ин самт идома дорад.
Таъмини иҷрои Фармони Президенти Ҷумҳурии Тоҷикистон аз 7 январи соли 2022, №311 “Оид ба омодагии ҳамаҷониба ба ҷашни 35 – солагии Истиқлоли давлатии Ҷумҳурии Тоҷикистон” аз самти муҳими фаъолият маҳсуб ёфта, аз 1 июли соли 2022 №350 Қарори Ҳукумати Ҷумҳурии Тоҷикистон иборат аз 580 банд ба тавсиб расид ва тибқи нақшаи чорабинии шаҳру ноҳияҳо дар ҷумҳурӣ бунёду азнавсозии 29 ҳазору 166 иншоот ба нақша гирифта шуда, ба ҳолати 1 марти соли ҷорӣ 19 ҳазору 265 адад иншоот бо таъсиси 39 ҳазору 787 ҷойҳои нави корӣ мавриди истифода қарор дода шудааст, ки 66 фоизи нақшаро дар бар гирифта, аз он 740 корхонаю коргоҳҳои саноатӣ, 678 иншоот дар соҳаи тандурустӣ, 1533 дар соҳаи маориф, 499 майдончаи варзишӣ, 185 иншооти истироҳатӣ-фарҳангӣ, 1098 иншоот дар соҳаи хизматрасонӣ, 655 бинои истиқоматӣ, 199 бинои маъмурӣ, 1951 иншоот дар соҳаи савдо ва хӯроки умумӣ, 362 адад купрукҳо, 2773 банд оид ба сохтмон ва таъмири роҳҳо ва 8592 адад дигар иншоотро ташкил медиҳад, ки қисми бештари онҳо дар маҳалу деҳоти аҳолишин бунёд гардида, барои беҳтар гардидани сатҳи зиндагии аҳолӣ, таъсиси ҷойҳои нави корӣ, фарогирии насли наврас ба таълиму тарбия, хизматрасониии тиббӣ, тарщиби тарзи ҳаёти солим ва такмилбахшии корҳо дар самти рушди маҳал мусоидат менамояд.
Тибқи нақша чорабиниҳои баргузории озмуни ҷумҳуриявии Фестивали гулҳо таҳти унвони «Сайри гули лола» дар қаламрави ҷумҳурӣ идома дошта, марҳилаи аввали он дар сатҳи ҷамоатҳои шаҳраку деҳот ҷамъбаст гардида, баъдан даври дуюм ва даври ҷамъбастии он бо қадршиносии ғолибон баргузор мегардад.
Баргузории озмуни беҳтарин шаҳру ноҳия, шаҳраку деҳот, деҳа, маҳалли аҳолинишин ва хонаи истиқоматӣ дар вилоятҳо ва шаҳру ноҳияҳои ҷумҳурӣ баҳри вусъат додани корҳои ободонӣ, бунёдкорию созандагӣ дар вилоятҳо, шаҳру ноҳияҳо, шаҳраку деҳот, деҳаҳо ва маҳаллаҳо, тарбияи ҳисси хештаншиносӣ, ватандӯстӣ, эҳтиром ба арзишҳои миллӣ, ифтихор аз анъанаҳои миллӣ, ҳифзи муҳити зист ва татбиқи нақшаи чорабинҳо бахшида ба ҷашни 35 солагии Истиқлоли давлатӣ баргузор гардида, щолибони озмуни даври ҷумҳуриявӣ муайян ва дар арафаи рӯзи Конститутсия бо мукофоти пулӣ ва ифтихораномаҳо сарфароз карда мешаванд.
Кумита дар асоси маълумоти дастрасгардида деҳаҳои навбунёд дар шаҳру ноҳияҳои Вилояти Мухтори Кӯҳистон Бадахшон, вилоятҳои Суғду Хатлон ва шаҳру ноҳияҳои тобеи ҷумҳуриро,мавриди таҳлил қарор дод.
Дар ҷумҳурӣ деҳаҳои навбунёд дар даврони Истиқлол 173 деҳаро ташкил дода, шумораи аҳоли дар ин деҳаҳо 325 ҳазору 577 нафарро ташкил медиҳад. Дар деҳаҳои мазкур 28 муассисаҳои томактабӣ, 150 муассисаҳои таълимӣ ва 112 бунгоҳҳои тиббӣ фаъолият доранд. Аз шумораи умумии аҳолии деҳаҳои болозикр 209 ҳазору 414 нафар ба обӣ ошомиданӣ дастрасӣ доранд, ки 64,3 фоизро дарбар гирифтааст.
Кумитаи рушди маҳали назди Президенти Ҷумҳурии Тоҷикистон, иҷрои супоришҳои Президенти Ҷумҳурии Тоҷикистон, Ҳукумати Ҷумҳурии Тоҷикистон, Роҳбари Дастгоҳи иҷроияи Президенти Ҷумҳурии Тоҷикистон ва санадҳои меъёрии ҳуқуқӣ, ки ба Кумита ворид мегарданд, дар муҳлатҳои муқарраргардида таъмин намуда, вобаста ба татбиқи сиёсати ягонаи давлатӣ дар соҳаи идоракунии рушди маҳал пайваста тадбирҳои зарурӣ меандешад.
Дар анҷоми мулоқот Раиси Кумита Шарифҷон Ҷумъазода ба ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа муҳтарам Раҳмонзода Абдулло барои иштирок ва пешниҳоди дастуру супоришҳои муфид изҳори сипос намуда, зикри он дошт, ки кормандони Кумита минбаъд низ дар роҳи амалисозии сиёсати оқилонаи Пешвои муаззами миллат, муҳтарам Эмомалӣ Раҳмон ва Ҳукумати Ҷумҳурии Тоҷикистон бештару беҳтар кору фаъолият намуда, дар пешрафту шукуфоии мамлакат саҳми назаррас хоҳанд гузошт.
